Código Cero - Diario Tecnolóxico de Galicia

Lérez Up regresa a Pontevedra cunha quinta edición chea de novidades

S. P. — 2026-04-21T21:03:58Z


Participantes na anterior edición da Lérez Up nunha imaxe de Gabriel Pardo

Pontevedra acollerá unha nova edición da Lérez Up, o salón do videoxogo e da cultura friki da cidade, que terá lugar os días 12 e 13 de setembro de 2026 no Recinto Feiral. Organizado por Gaming Troop en colaboración co Concello de Pontevedra, o evento preséntase novamente como “un espazo de encontro para públicos de todas as idades, reunindo a familias, mocidade e persoas adultas interesadas nos videoxogos, o Cosplay, a cultura xaponesa e o lecer alternativo”, segundo informou a organización.
Engaden que “esta quinta edición chega con novas propostas e espazos renovados pensados para ampliar a experiencia do público”.
A imaxe do evento está representada nun cartel ilustrado pola artista galega Tomotoad, xa difundido nas redes sociais do evento, no que se inclúen diferentes elementos que avanzan parte dos contidos desta edición.
Entre as primeiras actividades confirmadas destaca o torneo nacional de Super Smash Bros Ultimate, co prazo de inscrición xa aberto. As entidades organizadoras explican que esta competición “converteuse nun dos piares do evento, reunindo en anos anteriores participantes de distintos puntos de España e Portugal”, e de feito para esta edición a previsión é manter ese nivel de participación e seguir consolidando o torneo como unha das citas máis destacadas para a comunidade competitiva.
Nos vindeiros meses tamén se abrirán as inscricións para o concurso de K-pop e o concurso de Cosplay. Este último contará cun xurado profesional, do que xa se coñecen os primeiros nomes: o cosplayer zamorano Manueki e a cosplayer checa Rea. Ambos serán os encargados de valorar as propostas presentadas, nunha actividade que cada ano reúne a centos de persoas no salón de actos.
Entre os espazos principais volverá estar a zona de stands, organizada en postos comerciais e de artistas. Dirixida a ilustradores, artesáns e creadores, esta área volve espertar un grande interese, como xa ocorreu en edicións anteriores, nas que o número de solicitudes, segundo explican dende Gamin Troop, “superou amplamente a capacidade da que se dispón”. As bases e o formulario de inscrición para solicitar unha mesa publicaranse en datas vindeiras.
A programación incluirá tamén a zona indie, dedicada a estudos e desenvolvedores de videoxogos independentes. “Este espazo permitirá presentar proxectos ao público, recoller feedback e crear conexións dentro do sector”, sinalan dende Gaming Troop, engadindo que “para ir quentando motores, o 9 de maio organizarase unha xornada de portas abertas na Casa da Luz, na que se poderá desfrutar dunha pequena previa do evento, baixo o nome Á beira da Lérez Up, esta proposta ofrecerá unha mostra en formato máis reducido e familiar dalgunhas das actividades que estarán presentes na cita de setembro, amais de amosar as posibilidades do emprendemento e a gamificación a través do mundo dos videoxogos”.
Todas as novidades e actualizacións sobre a Lérez Up estarán nas novas redes sociais oficiais do evento (@lerez_up), así como na súa nova páxina web propia, creada especificamente para centralizar toda a información desta edición.

Xbox rebaixa o prezo de Game Pass Ultimate

Redacción — 2026-04-21T20:00:00Z

Microsoft actualizou as condicións de Xbox Game Pass cunha rebaixa no prezo do plan Ultimate, que pasa de 26,99 a 20,99 euros ao mes, revertendo parcialmente a forte suba aplicada en outubro de 2025. Os plans Essential e Premium manteñen os seus prezos en 8,99 e 12,99 euros mensuais, respectivamente.
A modificación de prezos chega acompañada dun axuste na estratexia de lanzamentos. Os futuros títulos da saga Call of Duty deixarán de incorporarse ao catálogo no mesmo día da súa estrea. En lugar diso, pasarán a formar parte de Game Pass Ultimate e PC Game Pass aproximadamente un ano despois do seu lanzamento, coincidindo coa campaña de Nadal. Os xogos xa dispoñibles da franquía seguirán accesibles sen cambios.
O plan Ultimate continúa a ofrecer acceso a centos de xogos en consola, PC e nube, incluíndo vantaxes adicionais dentro dos xogos, multixogador en liña en consola e acceso a Xbox Cloud Gaming. A proposta mantén tamén a incorporación de numerosos títulos desde o primeiro día, aínda que con excepcións destacadas como a saga Call of Duty tras este cambio.
A revisión responde á mala reacción dos usuarios ante a anterior suba de prezos, deixando tamén claro que o modelo de negocio do Game Pass non era sustentable a longo prazo.

O Oppo Find X9 Ultra chega a España a un prezo de 1.699 euros

Redacción — 2026-04-21T19:30:00Z

Oppo confirmou a chegada ao mercado español do Find X9 Ultra, o primeiro modelo da serie Ultra que a marca distribúe fóra de China. O smartphone, dispoñible en reserva anticipada por 1.699 euros na súa configuración única de 12 GB de RAM e 512 GB de almacenamento, preséntase para competir directamente na gama máis alta cun sistema fotográfico desenvolvido en colaboración con Hasselblad. O lema Your Next Camera resume a ambición dun dispositivo que aposta por sensores de alta resolución, ópticas especializadas e accesorios profesionais.
O Oppo Find X9 Ultra integra un sistema de catro cámaras que sobresae tanto pola resolución como pola versatilidade. O sensor principal acada os 200 Mpíxeles e está acompañado por outro teleobxectivo tamén de 200 Mpíxeles con zoom óptico 3x. A isto súmase un teleobxectivo periscópico de 50 Mpíxeles capaz de ofrecer un zoom óptico de 10x, así como unha cámara ultra grande angular de 50 Mpíxeles.
A colaboración con Hasselblad reflíctese tanto no procesado de cor como en modos específicos de captura. O terminal tamén admite gravación en 8K a 30 fps e 4K a 120 fps, ademais de perfís profesionais como O-Log2 e soporte para LUT 3D.
O ecosistema fotográfico complétase cun kit opcional (valorado en 599 euros pero achegado actualmente como agasallo) que permite acoplar un obxectivo externo e engadir controis físicos, buscando unha experiencia máis próxima á dunha cámara tradicional.
O Oppo Find X9 Ultra aposta por un panel AMOLED de 6,82 polgadas con resolución QHD+ e taxa de refresco de 144 Hz. O brillo máximo chega aos 1.800 nits en modo HBM, e a profundidade de cor alcanza os 1.000 millóns de cores.
No interior, o dispositivo integra o procesador Snapdragon 8 Elite Gen 5 de Qualcomm, acompañado de 12 GB de RAM e 512 GB de almacenamento. A batería, outro dos puntos destacados, acada os 7.050 mAh grazas ao uso de tecnoloxía de silicio-carbono, o que permite unha maior densidade enerxética sen aumentar o grosor do terminal. A carga rápida SUPERVOOC chega aos 100 watts por cable e aos 50 watts sen fíos.
Oppo acompaña o lanzamento con diferentes incentivos ata finais de abril, incluíndo descontos directos, melloras no programa de intercambio e agasallos valorados en ata 638 euros, entre os que se poden escoller accesorios fotográficos, unha tableta Oppo Pad 5 ou o novo reloxo Oppo Watch X3. Prevese que os teléfonos cheguen a mans dos seus compradores a partir do 14 de maio.

Novo Oppo Watch X3

Xunto ao Find X9 Ultra, Oppo tamén anunciou a chegada ao mercado español do Oppo Watch X3, o seu novo smartwatch premium. O dispositivo destaca polo uso dunha caixa de titanio aeroespacial e unha pantalla de 1,5 polgadas protexida con cristal de zafiro, elementos que buscan mellorar tanto a resistencia como a estética.
O reloxo aposta por unha arquitectura de dobre chip: un Snapdragon W5 Gen 1 para executar Wear OS 6 e un microcontrolador de baixo consumo que xestiona tarefas básicas mediante un sistema RTOS. Esta combinación permite estender a autonomía ata 5 días en modo intelixente e ata 16 días en modo de aforro, segundo os datos da compañía.
En termos de saúde e deporte, o Watch X3 incorpora máis de 100 modos deportivos, ECG certificado, medición de osíxeno en sangue, avaliación de variabilidade cardíaca e un chequeo completo de saúde en 60 segundos. Tamén ofrece certificacións IP68, IP69 e MIL-STD-810H, polo que está preparado para actividades ao aire libre e condicións esixentes.
O prezo oficial en España é de 379 euros, con descontos promocionais durante o período de reserva e a posibilidade de obtelo como agasallo ao adquirir o Find X9 Ultra.

ChatGPT estrea unha nova xeración da súa tecnoloxía de creación de imaxes

Redacción — 2026-04-21T18:30:00Z

A xeración de imaxes mediante IA dá un novo salto coa chegada de ChatGPT Images 2.0, unha evolución da tecnoloxía de OpenAI que introduce melloras substanciais na capacidade para interpretar instrucións complexas, organizar elementos con precisión e xerar composicións con maior coherencia estética e funcional.
O modelo destaca pola súa fidelidade á hora de reproducir detalles finos, un dos puntos tradicionalmente máis débiles neste tipo de sistemas. A capacidade para integrar texto pequeno, iconografía, interfaces ou composicións densas permite obter resultados directamente utilizables, reducindo a distancia entre a intención inicial e o resultado final. Ademais, amplía a resolución ata os 2K na API e admite unha maior variedade de relacións de aspecto, o que facilita a súa adaptación a formatos como carteis, pantallas móbiles ou banners panorámicos.
Tamén se rexistran avances significativos no tratamento de linguas distintas do inglés. O modelo mellora a representación de textos complexos en idiomas con alfabetos non latinos, como xaponés, coreano, chinés, hindi ou bengalí, permitindo que o contido lingüístico forme parte orgánica do deseño visual. Esta evolución favorece a creación de materiais gráficos multilingües con maior coherencia e calidade.
No plano estilístico, a ferramenta logra unha reprodución máis precisa de diferentes linguaxes visuais, desde fotografía realista ata manga, pixel art ou estética cinematográfica. A mellora na iluminación, textura e composición contribúe a que as imaxes resultantes presenten unha aparencia máis intencional e menos asociada aos patróns típicos da xeración automatizada.
Un dos elementos máis novidosos é a incorporación de capacidades de razoamento cando se empregan modelos con modo thinking. O sistema pode buscar información actualizada na web, verificar os seus propios resultados e xerar múltiples imaxes coherentes a partir dunha única solicitude. Isto permite desenvolver conxuntos visuais completos (como secuencias narrativas, propostas de deseño ou series gráficas) mantendo continuidade entre elementos e personaxes.
O modelo incorpora tamén un coñecemento máis recente do mundo (ata decembro de 2025), o que mellora a exactitude en contidos educativos, diagramas ou materiais explicativos. A súa capacidade para estruturar información e organizala visualmente con claridade reforza o seu papel como ferramenta de apoio á comunicación e á aprendizaxe.
A integración en contornos como Codex permite combinar a creación visual con procesos de deseño, prototipado e produción nunha mesma plataforma. Pola súa banda, a API con gpt-image-2 facilita a incorporación destas capacidades en produtos e servizos, especialmente en casos como publicidade localizada, contido educativo ou ferramentas de deseño.
A pesar dos avances, o sistema mantén limitacións en tarefas que requiren unha comprensión física complexa ou unha precisión extrema en certos detalles, como pregados complexos, crebacabezas ou patróns moi repetitivos. Tamén se recomenda revisar manualmente diagramas e etiquetaxes cando a exactitude sexa crítica.
ChatGPT Images 2.0 está dispoñible desde hoxe para usuarios de ChatGPT, Codex e a API, cun acceso ampliado ás funcións avanzadas para subscricións de pago.

A Zona Indie Dev de ExpOtaku A Coruña superará os 50 xogos na súa meirande edición

Redacción — 2026-04-21T17:53:28Z

A Zona Indie Dev de ExpOtaku A Coruña celebrará os días 23 e 24 de maio a súa edición máis ambiciosa ata o momento, cunha proposta que supera os 50 videoxogos dispoñibles e que reforza o seu papel como punto de encontro do desenvolvemento independente en Galicia.
O espazo ocupará a totalidade dos 40 postos dispoñibles, nos que se distribuirán 34 estudios independentes, catro centros de formación especializados e unha asociación do sector, ademais dun posto informativo da organización orientado á participación do público. Esta configuración permite reunir proxectos en diferentes fases de madurez, desde propostas académicas ata títulos impulsados por equipos consolidados.
Durante o evento, o público poderá probar máis de medio cento de xogos, tanto en desenvolvemento como xa publicados, e interactuar directamente cos seus creadores. A experiencia complétase cun sistema de votación aberto que permitirá escoller un dos premios principais, mentres que o segundo galardón será decidido polos propios estudios participantes. A participación nas votacións dará acceso tamén a un sorteo con recompensas asociadas.
A listaxe de participantes inclúe estudios como AIKODE, Axóuxere Games, Conxuro Studio, Deep Trap Studio, Dreamscape Games, Ecliptika Collective, Klayerama Studio, Monodo, Nine Bites, Quasar Factory ou Zeta Works, entre outros, xunto a centros de formación como CESUGA, Algorithmics e Liceo La Paz, e a asociación ACADEVI. A presenza destes actores evidencia un equilibrio entre talento galego e propostas chegadas doutras partes do Estado.
A edición de maio marca un novo fito na evolución deste espazo, que acada a súa capacidade máxima e consolida unha tendencia de crecemento sostido. O incremento de participación e visibilidade responde tanto ao interese crecente polo desenvolvemento de videoxogos como á necesidade de plataformas que faciliten a conexión entre creadores e público.
O impulso desta iniciativa conta co apoio de diversas entidades do sector, entre elas Tesura Games, Jandusoft, Devilish Games, GameIT e Gamevitation, ademais da propia organización de ExpOtaku. Este respaldo contribúe a fortalecer a proposta e ampliar o seu alcance.
A organización xa traballa na seguinte edición, prevista para os días 21 e 22 de novembro de 2026, coa intención de seguir ampliando o impacto da Zona Indie Dev e consolidala como unha referencia estable dentro do panorama independente.

Máis de 750 liñas de autobús da provincia de Pontevedra contan coa Plataforma Galega de Mobilidade MoBT

S. P. — 2026-04-21T15:00:00Z

Máis de 750 liñas de autobús da provincia de Pontevedra contan coa Plataforma Galega de Mobilidade 4.0 MoBT impulsada pola Axencia para a Modernización Tecnolóxica de Galicia (AMTEGA). A directora xeral de Mobilidade, Judit Fontela, e o director da AMTEGA, Damián Rey, informaron este martes 21 de abril, en Marín e no Porriño, das vantaxes da dita plataforma 4.0, activa xa en 20 contratos de transporte da provincia de Pontevedra que suman máis de 750 liñas. Segundo sinalaron, a previsión é “que estean cubertos o 100% dos desprazamentos interurbanos de toda a Comunidade a finais de ano”.
A solución, financiada con fondos europeos do Mecanismo de Recuperación e Resiliencia, permite o pago no autobús a través do teléfono móbil, eliminando así a necesidade de acudir a unha oficina bancaria, de dispoñer dunha tarxeta e de recargar no caixeiro.
O obxectivo, sinalaron Fontenla e Rey, “é facilitar o acceso ao transporte público mediante a incorporación de tecnoloxías avanzadas de pagamento, que permitan mellorar a experiencia do usuario, aumentar a eficiencia do sistema e fomentar o emprego do transporte público como alternativa sostible”. Así, engadiron, “as persoas usuarias dispoñen dunha conta na nube cun moedeiro virtual asociado”.
O saldo do moedeiro virtual pódese coñecer en cada momento e recargarse a través da aplicación móbil MoBT. Esta, dispoñíbel tanto para os dispositivos Android como para iOS, ten tamén entre as súas funcionalidades a xestión do moedeiro con recarga en liña e un histórico de viaxes. Dispón ademais dun buscador avanzado con todos os servizos de transporte público de Galicia para facilitar a planificación multimodal dos desprazamentos.
No caso de Marín, nunha visita ao IES Chan do Monte, Judit Fontela e Damián Rey indicaron que os catro contratos que cobren o concello contan xa coa plataforma activa, sumando 25 liñas. A continuación desprazáronse ao Porriño, onde informaron que hai cinco contratos que inclúen preto de 80 liñas coa plataforma activa.
Judit Fontela e Damián Rey animaron a poboación destas áreas a descargar a plataforma e facer uso dela para beneficiarse de todas as vantaxes que ofrece. Ademais de nas áreas de Pontevedra, Vigo e O Morrazo, no conxunto de Galicia, a solución pódese utilizar xa na área metropolitana da Coruña, na comarca do Salnés, na Mariña de Lugo e na Terra Chá, así como en desprazamentos de longo percorrido entre Ferrol e Ourense, Ferrol e Vigo , Lugo e Vigo e no directo entre A Coruña e Lugo.

Abertas as inscricións para o campus tecnolóxico de verán da USC

S. P. — 2026-04-21T14:30:00Z

Esta semana botou a andar na Universidade de Santiago o Campus Tecnolóxico de Verán Aventura STEM: Viaxe no Tempo, que ten aberto o prazo de inscrición e que está a ser organizada por Play Code Academy.
A iniciativa levará á Escola Politécnica Superior de Enxeñaría (EPSE) do Campus de Lugo e á Escola Técnica Superior de Enxeñaría (ETSE) do Campus de Santiago, programación, robótica e cultura para cativada de 6 a 16 anos.
Este campus temático ofrece unha combinación de diversión e aprendizaxe da Historia. Durante unha semana, as persoas participantes viaxarán a través do tempo. Profundarán na tecnoloxía e descubrirán como utilizala para resolver enigmas e afrontar novas situacións en cada un das súas viaxes.
Deste xeito aprenderán a programar drons para mapear xacementos arqueolóxicos; construír robots pintores con LEGO e Arduino; deseñar sistemas de alerta para refuxios prehistóricos con Micro:Bit e Edison; crear contornas virtuais en Delightex; ou deseñar e imprimir obxectos reais en 3D. Todo adaptado por idades e niveis, cun enfoque 100% práctico que fomenta a creatividade, o pensamento crítico e o interese pola Historia.
A primeira quenda desenvolverase do 22 ao 26 de xuño, mentres que a segunda terá lugar do 29 de xuño ao 3 de xullo. O persoal da USC gozará de prezos reducidos á hora de inscribirse nesta iniciativa.

A USC achegou referentes femininos STEM a 8.000 estudantes de primaria

S. P. — 2026-04-21T14:00:00Z

A Universidade de Santiago fixo balance da súa liña de traballo divulgador destinado a fomentar vocacións STEM (siglas de Ciencia, Tecnoloxía, Enxeñaría e Matemática) entre as rapazas. Así, máis de 8.000 estudantes de primaria de colexios de toda Galicia participaron no programa Unha enxeñeira ou científica en cada cole que a USC puxo en marcha hai 11 anos coa finalidade de impulsar talentos científico-tecnolóxicos entre as nenas e mozas e visibilizar enxeñeiras e científicas para crear referentes femininos.
No programa desta décimo primeira edición, que se desenvolveu entre os meses de febreiro e abril, participaron de maneira presencial nove colexios de Santiago e máis de 400 alumnos e alumnas, e de xeito virtual o impacto foi en 116 centros de toda Galicia chegando a preto de 7.300 rapaces e rapazas.
Organizado pola Oficina de Igualdade de Xénero da USC en colaboración co Concello de Santiago, a iniciativa busca incentivar a presenza de rapazas en carreiras relacionadas coas disciplinas coñecidas como STEM, coa realización de obradoiros didácticos destinados ao alumnado de 4º de primaria en colexios públicos.
Nesta edición, de Santiago participaron os colexios Mestre Rodríguez Xixirei, Cardeal Quiroga Palacios, Pío XII, Ramón Cabanillas, Vite, López Ferreiro, Lamas de Abade, Apóstolo Santiago e Roxos. Todos eles están coordinados por Ana Isabel Gómez Varela e impartidos por profesoras investigadoras da USC de diferentes áreas (Ciencia da Computación e Intelixencia Artificial, Electrónica e Computación, Enxeñería Química, Física Aplicada, Química Inorgánica, Química Orgánica, Química Analítica, Óptica) e investigadoras do Centro de Supercomputación de Galicia (CESGA).

O CPEIG concede o seu Premio Ada Byron á doutora en Informática Virginia Mato

S. P. — 2026-04-21T11:04:20Z

Un ano máis o Colexio Profesional de Enxeñaría en Informática de Galicia (CPEIG) organiza o seu Premio Ada Byron da XVIII Noite da Enxeñaría en Informática de Galicia de 2026. Desta volta a galardoada é a enxeñeira informática e doutora en Informática Virginia Mato Abad, que recollerá a distinción na XVIII NOITE da Enxeñaría en Informática de Galicia, que se celebrará o 12 de xuño no Hotel OCA Puerta del Camino de Santiago de Compostela.
Dende o CPEIG apuntan a Virginia Mato como unha enxeñeira que representa un “referente próximo e necesario”, cunha traxectoria que demostra que as mulleres poden acadar o éxito na enxeñaría, desmontando a idea de que a tecnoloxía é só cousa de homes. “Co seu exemplo inspira a nenas e mozas, animando vocacións e amosando ás familias que hai modelos a seguir. Premiala é un paso máis para desmitificar a profesión e fomentar unha sociedade máis diversa e inclusiva”, argumenta o Colexio.
Achegándonos á figura de Virginia Mato Abad (1982), dicir que é natural da Coruña, pero mudouse a Padrón sendo moi nena. É enxeñeira informática (2007) e doutora en Informática (2011) pola Universidade da Coruña (UDC). Segundo Virginia, como docente: “Trasladamos ao estudantado unha maior conciencia do impacto real que ten a tecnoloxía na sociedade. Xa non se trata só de desenvolver ferramentas, senón de entender para que se utilizan e como inflúen en ámbitos tan diversos como a saúde, a educación ou a sostibilidade”, indica. De cara ao futuro, Virginia Mato subliña que todo apunta a que a profesión evolucionará cara a perfís aínda máis interdisciplinarios, cunha combinación de competencias técnicas e habilidades como a adaptación, a creatividade ou a capacidade de análise. “A irrupción da intelixencia artificial xenerativa supón un reto que está transformando o xeito no que se aprende e se traballa, obrigando a reformular metodoloxías docentes e a poñer máis énfase na comprensión, o pensamento crítico e o uso responsábel destas ferramentas. É unha profesión en constante transformación e adaptación”, engade.
Alén do seu rol académico, Virginia Mato sobresae polo seu firme compromiso social, co dirixindo desde novembro de 2021 a Cátedra ALDABA-WIB (Women, ICT & Business), unha cátedra interuniversitaria entre a UDC e a Universidade de Vigo (UVigo) que ten como obxectivo impulsar iniciativas que contribúan a dar visibilidade ás mulleres no mundo das TIC, promovendo vocacións tecnolóxicas e rachando estereotipos de xénero para que nenas e nenos poidan decidir o seu futuro profesional con información veraz e obxectiva.
Virginia Mato fala de proxectos importantes que levou a cabo a Cátedra nestes anos, como o Barómetro de brecha de xénero BBG-TIC, un estudo pioneiro para medir e analizar a brecha de xénero nos estudos tecnolóxicos en Galicia, achegando datos esenciais para a toma de decisións institucionais. Os datos recollidos polo barómetro expresan que nos últimos cinco anos a matriculación feminina en primeiro curso situouse entre o 12 % e o 19 %, este último dato no curso 2023/2024 sendo a maior matriculación feminina desde que se implantou o grao.
Esta baixa representación feminina ten, segundo Virginia Mato, implicacións graves no mercado laboral: perda de talento e competitividade. “Cando as mulleres non participamos nas carreiras TIC, o sector perde unha pluralidade de perspectivas esencial que empobrece a calidade da innovación. Unha tecnoloxía avanzada nace de equipos diversos e representativos. Tamén se perpetúan as fendas na tecnoloxía ao non responder ás necesidades de toda a sociedade. E, finalmente, unha brecha de oportunidades laborais e económicas, xa que as mulleres fican desprazadas dun mercado laboral con alta demanda e excelentes proxeccións”, asegura.
Asemade, dentro da Cátedra, Virginia Mato explica que se desenvolven outras iniciativas que abranguen distintas etapas, desde a infancia até a universidade:
- O ALDABA TIC-Camp, un campamento tecnolóxico de verán na Facultade de Informática da UDC e na Escola Superior de Enxeñaría Informática da UVigo. Está dirixido a nenas e nenos de entre 6 e 12 anos e busca espertar vocacións desde idades temperás a través dun enfoque práctico e lúdico. (Desde o seu comezo no verán de 2023, participaron máis de 300 menores, dos cales un 80 % foron nenas).
- O VisibilizaTIC, un programa orientado a estudantes de ESO e Bacharelato que busca achegar exemplos reais de mulleres profesionais do sector TIC aos centros educativos, para que inspiren ás adolescentes a elixir carreiras tecnolóxicas.
- Vídeos pola igualdade nas TIC, un certame dirixido a estudantes de ESO para que, a través da creación de pezas audiovisuais breves, poidan reflexionar sobre estereotipos, acceso á tecnoloxía e expectativas de futuro coa súa propia linguaxe.
- Premios ao talento, unha iniciativa que busca recoñecer e dar visibilidade a proxectos universitarios (TFG ou TFM) que contribúen a reducir a brecha de xénero nas TIC, fomentando así a participación feminina e axudando a derribar barreiras no eido tecnolóxico.
Virginia Mato exerce na actualidade como profesora titular do Departamento de Ciencias da Computación e Tecnoloxías da Información da UDC, mais de ser a coordinadora da Mención de Enxeñaría de Software do Grado en Enxeñaría Informática.

As comunidades con lingua propia recoñecen o proxecto audiovisual galego Pensión incompleta

S. P. — 2026-04-21T10:30:00Z

O secretario xeral da Lingua, Valentín García, participou a semana pasada en Bilbao na comisión de seguimento do protocolo de colaboración en materia de política lingüística subscrito polos gobernos de Galicia, Cataluña, Euskadi, Navarra, Valencia e Illas Baleares, unha reunión que se produce cada ano no marco da cooperación entre os departamentos desta materia das comunidades autónomas con lingua propia.
Ao abeiro desta xuntanza, o grupo decidiu recoñecer co Premio á Diversidade Lingüística do Estado Español a serie galega Pensión incompleta, a primeira rodada nas catro linguas oficiais de España e producida por EITB, TVG, 3CAT e Voz Audiovisual.
García mostrou a súa satisfacción porque se trata “dun proxecto pioneiro que leva selo galego e no que colaboramos directamente desde o Goberno autonómico cunha axuda á produción de 240.000€”. Tamén destacou que o recoñecemento “pon en valor a fórmula de colaboración entre televisións autonómicas para levar a cabo unha produción audiovisual que, a través dunha estrutura narrativa compartida, retrata a riqueza cultural, lingüística e natural dos diferentes territorios”.
Amais, García lembrou que o premio distingue o labor realizado por persoas, entidades ou empresas no ámbito da defensa e a promoción da diversidade lingüística, e que que foi concedido por última vez en 2020 a outro proxecto galego, concretamente ao disco multilingüe Immersión, no que a artista Guadi Galego incluíu cancións en sete linguas peninsulares.
Durante a xuntanza fíxose repaso dos avances levados a cabo sobre algúns asuntos que se trataron en 2025 no encontro que tivo lugar en Santiago de Compostela. Trátase de cuestións que teñen que ver coa situación das linguas nos ámbitos non formais, especialmente no que se refire á mocidade, “no que o Goberno galego está a incidir con distintas medidas formuladas ao abeiro do Pacto pola Lingua”, apuntou Valentín García.

Samsung facilita a integración no fogar dos dispositivos de IKEA

Marcus Fernández — 2026-04-21T10:10:00Z

A compañía de orixe sueca IKEA leva anos apostando firmemente polo fogar conectado con toda unha serie de dispositivos que van dende altofalantes ata lámpadas, pasando por sensores de distinto tipo, liña de produtos que podería dar un importante salto adiante grazas á colaboración con Samsung, compañía que está a anunciar o reforzo da súa plataforma de fogar intelixente SmartThings coa integración ampliada dos novos dispositivos compatibles con Matter de IKEA. Isto supón unha redución de custos e simplicación da adopción deste tipo de tecnoloxías entre o grande público.
A compañía surcoreana confirmou a compatibilidade directa con 25 dispositivos de IKEA baseados en Matter-over-Thread, entre os que se inclúen lámpadas intelixentes, enchufes, sensores ambientais e de movemento, así como detectores de fugas de auga. Esta integración elimina a necesidade de empregar simultaneamente hubs específicos de IKEA e SmartThings, permitindo que os dispositivos se conecten directamente ao ecosistema de Samsung.
A adopción do estándar Matter supón un avance relevante en termos de interoperabilidade, xa que facilita o funcionamento conxunto de dispositivos de distintos fabricantes baixo unha mesma infraestrutura. Neste caso, os produtos de IKEA poden integrarse tamén con electrodomésticos de Samsung (como televisores, sistemas de climatización ou lavadoras) e con outros dispositivos compatibles coa plataforma.
Un dos eixes desta actualización é o reforzo das funcionalidades orientadas ao coidado no fogar. A través de SmartThings Family Care, por exemplo, os usuarios poden monitorizar a actividade diaria de familiares mediante sensores de portas, mentres que os sensores ambientais permiten recompilar datos sobre temperatura, humidade ou calidade do aire. Estes datos son analizados pola plataforma para xerar recomendacións automatizadas, como axustar a temperatura do dormitorio a un intervalo de entre 19 e 21 graos para optimizar o descanso.
Ademais, o sistema permite crear rutinas automatizadas: activar o modo de deshumidificación do aire acondicionado cando aumenta a humidade ou enviar alertas inmediatas en caso de detectar fugas de auga son algúns dos exemplos prácticos desta integración.
No apartado de control, destaca a introdución dun mando con roda xiratoria que permite axustar con precisión parámetros como o brillo ou a temperatura de cor da iluminación. Este dispositivo tamén pode empregarse para controlar elementos como persianas, ofrecendo unha interacción máis intuitiva e orientada ao deseño.
Samsung subliña o seu papel na adopción temperá de Thread 1.4, un protocolo de rede de baixo consumo e curto alcance clave para o desenvolvemento de ecosistemas domésticos conectados. A súa implementación permite que redes Thread de diferentes marcas operen como un único sistema unificado, mellorando a estabilidade e a experiencia de usuario.

Vitae achéganos aos beneficios das entrevistas condutuais estruturadas en selección de persoal

S. P. — 2026-04-21T09:43:26Z

Vitae segue a achegar recursos formativos (teóricos e sobre todo prácticos) para mellorar o día a día dos profesionais dos recursos humanos e esta primavera, sen ir máis lonxe, ofrece a segunda edición do curso Deseño e Aplicación de Entrevistas Condutuais Estruturadas en Selección de Persoal. O curso, de 12 horas de duración, desenvolverase os días 26 e 27 de maio e máis o 2 e o 3 de xuño, sendo impartida pola experta Silvia Moscoso.
Vitae explica que a Entrevista Condutual Estruturada (ECE polas súas siglas) é un dos métodos de selección de persoal con maior validez preditiva, “o que converte esta técnica nun dos mellores instrumentos para avaliar o axuste das persoas aos postos e organizacións”.
Ademais, engade Vitae, a ECE posúe unhas características diferenciadas das entrevistas convencionais e require adestramento previo tanto para o seu deseño como para a súa posterior aplicación se queremos aproveitar todo o seu potencial como ferramenta de selección.
Os obxectivos deste curso son os seguintes:
-Coñecer o proceso de deseño dunha entrevista condutual estruturada e os elementos que a compoñen: competencias, preguntas e EVAS.
-Saber aplicar unha entrevista condutual estruturada e a valoración das respostas condutuais.
-Diferenciar as respostas convencionais das respostas condutuais dunha entrevista.
-Coñecer as estratexias para obter respostas condutuais.
Os contidos serán impartidos por Silvia Moscoso, doutora en Psicoloxía pola Universidade de Santiago de Compostela e catedrática de Psicoloxía do Traballo na Universidade de Santiago de Compostela. Foi Decana da Facultade de Relacións Laborais desde o ano 2012 ata o 2023. Ten catro sexenios de investigación e un de transferencia do coñecemento. Ademais, publicou máis de cincuenta artigos en revistas de prestixio como o Journal of Personality and Social Psychology, Journal of Applied Psychology, Personnel Psychology, International Journal of Selection and Assessment, European Journal of Work and Organizational Psychology ou o European Journal of Personality.
É co-autora de libros e capítulos de libros publicados en editoriais como Prentice-Hall, Edition dé Organization París, Routlege, Springer, Wiley-Blackwell, Psychology Press, Pirámide, Sainz e Torres. Investigadora principal en varios proxectos de investigación do Plan Nacional de I+D. Experiencia en xestión investigadora, foi coordinadora adxunta da AEI (Axencia Estatal de Investigación) para a área de Psicoloxía entre os anos 2012 e 2015.
Actualmente é editora asociada do Journal of Work and Organizational Psychology e membro do Editorial Board do Journal of Occupational and Organizational Psychology e do International Journal of Selection and Assessment.

Novos auriculares pechados de Sennheiser

Redacción — 2026-04-21T09:27:45Z

Sennheiser anunciou o lanzamento dos novos HD 480 PRO, uns auriculares profesionais de tipo pechado orientados a tarefas de gravación, monitorización e mestura tanto en estudio como en directo. Este modelo sitúase como alternativa aos HD 490 PRO de tipo aberto, de xeito que a escolla entre ambos auriculares dependerá dos escenarios de uso.
Un dos principais retos técnicos dos auriculares pechados é a resposta no rango grave, que adoita verse afectada por resonancias internas e unha menor naturalidade respecto dos modelos abertos. Os HD 480 PRO abordan esta limitación cunha reprodución do low-end máis axustada e precisa, mantendo unha resposta en frecuencia sen coloracións. Este comportamento resulta clave en contextos profesionais, onde a tradución do son a outros sistemas de reprodución (altofalantes domésticos, sistemas de automóbil ou equipos de PA) depende dunha monitorización fiable.
Desde o punto de vista acústico, os auriculares empregan un transdutor dinámico de 38 mm cunha resposta en frecuencia que abrangue de 3 a 28.700 Hz (a -10 dB), cun nivel de presión sonora máximo de 130 dB SPL e unha distorsión harmónica total inferior ao 0,5 % a 1 kHz e 100 dB SPL. A impedancia sitúase nos 130 ohms, un valor que os orienta a equipos profesionais ou interfaces de audio capaces de fornecer unha amplificación adecuada. As bobinas móbiles ultralixeiras contribúen a unha resposta dinámica máis rápida e a unha maior fidelidade na reprodución de transitorios.
Outro dos elementos técnicos destacados é o denominado sistema de atenuación de vibracións (Vibration Attenuation System), un conxunto de solucións de deseño destinadas a minimizar vibracións, reflexións internas e distorsións mecánicas que poidan degradar a claridade do sinal. A isto súmase un sistema de illamento pasivo en varias etapas, pensado para reducir a interferencia do ruído externo sen recorrer a cancelación activa.
Os auriculares HD 480 PRO incorporan varias solucións patentadas para unha mellor ergonomía, como a chamada Special Axes Geometry, que permite manter unha presión de contacto uniforme independentemente da forma da cabeza do usuario, mentres que as almofadas inclúen zonas específicas para as patillas das lentes, garantindo o selado acústico sen comprometer o confort. O peso total é de 272 gramos sen cable, o que os sitúa nun rango relativamente lixeiro para uso prolongado.
Tamén se introducen melloras prácticas orientadas ao uso diario en estudio. O cable é desmontable e pode conectarse en calquera dos dous lados, facilitando a adaptación a diferentes configuracións de gravación. Ademais, inclúe un tramo en espiral preto do conector do auricular que actúa como desacoplador de ruídos transmitidos polo cable, como golpes ou vibracións sobre a mesa. Os cascos están marcados en braille para identificar esquerda e dereita, un detalle pouco habitual nesta categoría.
Os HD 480 PRO chegan ao mercado cun prezo recomendado de 399 euros, mentres que a versión HD 480 PRO Plus, que substitúe a bolsa de transporte por un estoxo ríxido, ascende a 439 euros. Ambos modelos inclúen almofadas orientadas a gravación e un cable en espiral de tres metros, ademais de compatibilidade cun amplo catálogo de accesorios opcionais.

IES Aquis Celenis de Caldas de Reis gaña a fase galega do CanSat da Axencia Espacial Europea

S. P. — 2026-04-21T08:57:19Z

O Instituto Aquis Celenis, de Caldas de Reis, proclamouse gañador, este luns 20 de abril, da fase autonómica do certame CanSat organizado pola Axencia Espacial Europea e dirixido a estudantes de 14 a 19 anos. Será o representante de Galicia na fase nacional do concurso que se celebrará en maio. Na xornada, a Consellería de Educación, Ciencia, Universidades e FP organiza o lanzamento dos satélites elaborados polo alumnado dos centros educativos da nosa Comunidade.
Nesta final, celebrada no aeródromo As Gaivotas, en Cerceda, e á que asistiu o secretario xeral técnico da Consellería, Manuel Vila, tomaron parte un total de 12 equipos de competición.
O xurado comprobou os pesos, medidas, baterías e frecuencias dos aparellos e seleccionou os seis mellores proxectos, que foron lanzados no foguete. Logo, o alumnado dos seis equipos finais defenderon os seus proxectos diante do xurado que, analizadas a súas intervencións, os satélites deseñados e as medicións que se realizaron con eles, outorgou os seguintes galardóns:

Premio	Concello	Centro	Proxecto
Mellor proxecto CanSat	Caldas de Reis	IES Aquis Celenis	Aquisat V 2
Mellor logro técnico	San Sadurniño	CPI de San Sadurniño	Nouscan 12
Misión científica máis destacada	Ourense	IES Universidade Laboral	Barreiros
Equipo máis profesional	Vigo	CPR Montecastelo	MontecasteloSAT6
Premio honorífico	Ortigueira	IES de Ortigueira	Chatarrin
A Coruña	CPR Salesiano	SalesCansat
Mellor proxecto CanSat	Sada	CEIP O Mosteirón	Os mosteiriños creativos
Mellor póster	A Rúa	CEIP Manuel Respino	GalSat
Premio honorífico	Santiago de Compostela	CPR Vilas Alborada	MicroAlborada

En canto aos 16 equipos que participaban só en modo demostración, ao longo da xornada tiveron a oportunidade de participar en retos cognitivos así como nunha simulación de adestramento para astronautas.
Como novidade, este ano contouse cun foguete que elevou os satélites dos equipos finalistas ata unha altura de case que 1 km. Ademais, en lugar de contar con drons de pequeno formato, capaces de lanzar un máximo de catro Cansats á vez, utilizouse un dron de gran formato para o resto de participantes.
Proxecto espacial
Un CanSat é unha simulación dun satélite integrada dentro do volume e peso dunha lata de refrescos. De feito, o termo procede das palabras en inglés can (lata) e sat (satélite). O desafío para o alumnado consiste en introducir nun espazo reducido os principais elementos dun satélite real, como a alimentación eléctrica, os sensores e o sistema de comunicacións. A continuación, lánzase o CanSat ou déixase caer desde unha plataforma mediante un dron, un globo cativo, un foguete ou calquera outro método. O experimento científico consiste en lograr unha aterraxe sen danos e a análise dos datos durante o descenso.
Durante os meses de preparación, os estudantes, co apoio dos seus profesores, desenvolven as súas iniciativas seguindo os procedementos dun proxecto espacial. Para iso, seleccionan os obxectivos da misión, definen os requisitos técnicos necesarios para logralos, deseñan o hardware e o software e o sistema de telecomunicacións desde terra. Antes de chegar á xornada de competición realizan varias probas e preparan a presentación do proxecto e a documentación.
O obxectivo de CanSat é “favorecer a aprendizaxe práctica do alumnado e o seu traballo en equipo, ao tempo que se familiariza coa metodoloxía de investigación científica e adquire competencias en tecnoloxía, matemáticas, física e programación, pero tamén en arte e creatividade”, informou a Consellería.

Na Rede e en galego unha guía para garantir navegacións seguras co-elaborada polo grupo Stellae da USC

S. P. — 2026-04-21T08:15:00Z

Os equipos de investigación Stellae, Crie e Edullab veñen de publicar a guía Entre a oportunidade e a prohibición: riscos e malos usos da tecnoloxía na adolescencia, un recurso educativo dirixido ao alumnado de Educación Secundaria que busca promover un uso responsábel, crítico e seguro das tecnoloxías dixitais.
A publicación, que xa podemos descargar de balde dende a Rede, forma parte do proxecto de investigación Os materiais didácticos dixitais na Educación Secundaria Obrigatoria. Análise e propostas para o seu uso escolar e sociofamiliar (Secundari@ Dixit@l, PID2022-137366OB-I00. IPs: Jesús Rodríguez Rodríguez e Diana Marín Suelves), no que participan grupos da Universidade de Santiago de Compostela, a Universitat de València e a Universidade de La Laguna.
A guía está editada inicialmente en galego, valenciano e castelán e, está prevista a súa publicación en inglés e portugués, co obxectivo de ampliar o seu alcance e impacto educativo a nivel internacional, explican os ditos equipos de investigación, que engaden que “a obra aborda de maneira clara os principais riscos asociados ao uso das tecnoloxías na adolescencia, combinando explicacións con situacións reais representadas en formato visual”.
Entre os temas tratados destacan o ciberacoso, a sobreexposición nas redes sociais, o acceso a contidos inapropiados, o uso da intelixencia artificial ou os riscos asociados aos videoxogos e ás compras en liña.
Segundo se recolle na guía, o seu propósito é “axudar á mocidade a tomar decisións máis conscientes no uso da tecnoloxía”, ofrecendo tamén recomendacións prácticas tanto para o ámbito persoal como educativo.
O documento estrutúrase en varios bloques que inclúen: situacións cotiás no ámbito persoal e escolar, recomendacións para adolescentes, recursos complementarios e información adicional e máis unha enquisa de autoavaliación sobre hábitos dixitais
Un enfoque educativo baseado na concienciación
No canto de propor a prohibición do uso tecnolóxico, a guía aposta por “un enfoque equilibrado que combina oportunidades e riscos, promovendo o pensamento crítico e o benestar dixital”. Tal e como se destaca no documento, “o uso responsábel da tecnoloxía é unha responsabilidade compartida entre adolescentes, familias, centros educativos e institucións”.
Deste xeito, a publicación pretende contribuír á transferencia do coñecemento científico á sociedade, facilitando ferramentas útiles para a educación dixital nun contexto no que a tecnoloxía forma parte esencial da vida cotiá da mocidade.
A publicación pode descargarse xa en galego e tamén en castelán.

CSS á carta: unha charla participativa para entender os efectos visuais desde dentro

Redacción — 2026-04-21T08:00:00Z

A Coruña acollerá o vindeiro xoves 23 de abril unha nova sesión centrada no desenvolvemento frontend baixo o título CSS (non tan) magic á carta, unha proposta que pretende analizar os efectos visuais en CSS desde unha perspectiva técnica e comprensible.
A charla, que se celebrará ás 19:30 horas no espazo WekCo (Novo Mesoiro, nº 2 baixo), estará conducida por Alberto García Ariza, quen propón un formato participativo no que o público terá un papel activo. Os asistentes poderán suxerir exemplos reais de efectos visuais que serán analizados en directo, descompoñendo o seu funcionamento, os principios que os sustentan e as técnicas necesarias para reproducilos.
A sesión, organizada por WordPress Coruña, busca afastarse da percepción do CSS como unha ferramenta opaca ou baseada en trucos, apostando por unha explicación aplicada e razoada do seu comportamento. Está orientada tanto a profesionais con experiencia como a persoas que se están a iniciar no ámbito do frontend.
Tras a actividade, está previsto un encontro informal de networking acompañado de petiscos e bebidas.

Perfil do relator

Alberto García Ariza conta cunha traxectoria que combina formación en Belas Artes e un doutoramento en Deseño, cunha tese centrada no código como práctica creativa. Ao longo de máis de vinte anos desenvolveu diferentes roles no ámbito dixital, desde deseñador ata desenvolvedor web, cunha especialización progresiva no frontend.
Durante unha década exerceu como docente na Facultade de Belas Artes, centrado no creative coding, e na actualidade continúa ligado á formación en diversos posgraos, onde imparte materias como UX, HTML e CSS. Ademais, participou como relator en eventos de referencia como OFFF.
Desde 2021 traballa como Frontend Engineer en Cognizant Netcentric, onde tamén destaca como referente interno no ámbito do CSS, contribuíndo á súa evolución e boas prácticas dentro da comunidade técnica da compañía.

John Ternus collerá a remuda de Tim Cook á fronte de Apple

Redacción — 2026-04-20T21:43:22Z

: John Ternus converterase no máximo responsable de Apple

Apple reorganiza a súa cúpula directiva cun relevo histórico na dirección executiva poucos días despois da celebración do seu 50º aniversario e un mes despois de que o seu máximo responsable negase os rumores da súa retirada nunha entrevista para a ABC no programa Good Morning America.
A compañía de Cupertino anunciou que Tim Cook deixará o cargo de conselleiro delegado para asumir a presidencia executiva do consello de administración, mentres que John Ternus será o novo director executivo a partir do 1 de setembro de 2026. O cambio, aprobado por unanimidade, culmina un proceso de planificación da sucesión desenvolvido a longo prazo.
Cook manterase como máximo responsable ata o verán para facilitar unha transición progresiva. Xa como presidente executivo, continuará implicado en cuestións estratéxicas, incluída a relación con responsables políticos a nivel global. Pola súa banda, Ternus, ata agora vicepresidente sénior de Enxeñaría de Hardware, incorporarse tamén ao consello de administración.

: O novo director de hardware de Apple é agora Johny Srouji

O movemento inclúe outros axustes relevantes na estrutura directiva. Arthur Levinson, presidente non executivo durante os últimos 15 anos, pasará a exercer como conselleiro independente principal. Ademais, Johny Srouji foi nomeado director de hardware con efecto inmediato, asumindo competencias ampliadas que abarcan tanto a enxeñaría de hardware como o desenvolvemento de tecnoloxías clave.
A traxectoria de Cook ao fronte da empresa, iniciada en 2011, está marcada por unha forte expansión. Durante o seu mandato, Apple multiplicou a súa capitalización ata superar os 4 billóns de dólares, mentres que os ingresos anuais pasaron de 108.000 millóns de dólares a máis de 416.000 millóns. A compañía reforzou a súa presenza internacional ata superar os 200 países e territorios e ampliou significativamente a súa base de dispositivos activos, que supera os 2.500 millóns.
A etapa de Cook caracterizouse pola diversificación de produtos, coa introdución de categorías como o Apple Watch, os AirPods ou o Apple Vision Pro, así como polo crecemento do negocio de servizos, que supera os 100.000 millóns de dólares anuais. Tamén impulsou a transición cara a procesadores propios, un movemento estratéxico que reforzou o control tecnolóxico da compañía e mellorou a eficiencia dos seus dispositivos.
John Ternus, con máis de dúas décadas na empresa, desempeñou un papel clave no desenvolvemento de produtos emblemáticos. Incorporado en 2001, liderou proxectos en múltiples liñas, desde o iPhone ata o Mac, pasando polo iPad ou os AirPods. Nos últimos anos destacou polo seu traballo na evolución dos computadores Mac, así como pola renovación da gama de teléfonos intelixentes e o impulso de melloras en durabilidade, materiais e impacto ambiental.
Pola súa banda, Johny Srouji consolídase como unha figura central na estratexia tecnolóxica da compañía. Responsable do desenvolvemento dos chips propios desde a chegada do A4, dirixiu avances en áreas como procesadores, baterías, cámaras ou módems. O seu novo rol integra baixo unha mesma dirección a enxeñaría de hardware e as tecnoloxías asociadas, reforzando a cohesión entre deseño e innovación.

Entrevista recente na que Tim Cook nega os rumores da súa próxima retirada da dirección executiva de Apple

Mensaxe de despedida

Tim Cook publicou carta á comunidade de Apple anunciando a súa retirada como director executivo, o que non supón un adeus á compañía:

Á comunidade de Apple:

Durante os últimos 15 anos, comecei case todas as mañás da mesma maneira. Abro o meu correo electrónico e leo as notas que recibín o día anterior de usuarios de Apple de todo o mundo.
Compartides comigo pequenos fragmentos das vosas vidas e contádesme cousas que queredes que saiba sobre como Apple vos influíu. Sobre o momento en que a vosa nai foi salvada polo seu Apple Watch. Sobre o selfie perfecto que capturastes no cumio dunha montaña que semellaba imposible de escalar. Agradecédesme as formas nas que o Mac cambiou o que podedes facer no traballo e, ás veces, dadesme un toque de atención porque algo que vos importa non funciona como debería.
En cada un deses correos sinto o latido do corazón da nosa humanidade compartida. Sinto un sentido de obriga cada vez máis profundo de traballar máis duro e chegar máis lonxe. Pero, sobre todo, sinto unha gratitude que non podo expresar con palabras por chegar a ser, dalgún xeito, a persoa ao outro lado deses correos; o líder dunha empresa que acende a imaxinación e enriquece vidas de formas tan profundas que desafían calquera descrición. Que honra e que privilexio foi.
Hoxe anunciamos que vou dar o seguinte paso na miña viaxe en Apple. Durante os vindeiros meses, farei a transición cara a un novo papel, deixando o posto de CEO en setembro e converténdome en presidente executivo de Apple. Unha nova persoa asumirá o que sinto de corazón que é o mellor traballo do mundo. Ese líder é John Ternus, un enxeñeiro e pensador brillante que pasou os últimos 25 anos creando os produtos de Apple que tanto aman os nosos usuarios, obsesionado con cada detalle, centrado en cada forma posible na que podemos facer algo mellor, máis audaz, máis fermoso e máis significativo. É a persoa perfecta para o posto.
A John impórtalle moito quen somos en Apple, que facemos en Apple, a quen chegamos en Apple, e ten o corazón e o carácter para liderar cunha integridade extraordinaria. Estou moi orgulloso de chamalo o próximo CEO de Apple. Esta empresa alcanzará cotas incribles baixo o seu liderado, e vós sentiredes o seu impacto en cada chispa de deleite e descubrimento que xurda dos produtos e servizos por vir. Estou ansioso por que o coñezades como eu o coñezo.
Isto non é un adeus. Pero neste momento de transición, quería aproveitar a oportunidade para darvos as grazas. Non en nome da empresa, esta vez, aínda que hai unha fonte de gratitude cara a vós que desborda as nosas paredes. Senón simplemente en nome de min. Tim. Unha persoa que creceu nun lugar rural nunha época diferente e que, por estes momentos máxicos, puido ser o CEO da mellor empresa do mundo.
Grazas pola confianza e a amabilidade que me amosastes. Grazas por saudarme na rúa e nas nosas tendas. Grazas por celebrar canda min cando presentabamos un novo produto ou servizo. Grazas, sobre todo, por confiar en min para dirixir a empresa que sempre vos puxo no centro do noso traballo. Cada día levantámonos pensando en que podemos facer para que a vosa vida sexa un pouco mellor. E cada día, vós fixestes que a miña fose a mellor que podería ter pedido.

Grazas.

Xbox Game Pass suma novos xogos

Redacción — 2026-04-20T20:30:00Z

Xbox Game Pass amplía o seu catálogo nas vindeiras semanas cunha nova fornada de títulos que combina propostas independentes, grandes franquías e lanzamentos dispoñibles desde o primeiro día. A actualización inclúe xogos que van desde aventuras narrativas ata acción frenética, pasando por estratexia clásica e experiencias máis experimentais.
A partir do 21 de abril chegan varias incorporacións, entre elas Little Rocket Lab, un xogo de rol de construción con ton acolledor no que o xogador debe axudar a completar un foguete mentres colabora coa comunidade local. Ese mesmo día incorpórase tamén Sopa: Tale of the Stolen Potato, unha aventura narrativa con compoñente emocional ambientada nun mundo máxico inspirado en América do Sur, así como Vampire Crawlers, unha reinterpretación en clave táctica e baseada en cartas do éxito Vampire Survivors.
Nos días seguintes súmanse máis lanzamentos. O 23 de abril estará dispoñible Kiln, unha proposta multixogador que mestura creatividade e combate a través de figuras de cerámica creadas polos propios xogadores. O 28 de abril será a quenda de Aphelion, unha aventura de ciencia ficción en terceira persoa desenvolvida por Don't Nod en colaboración coa Axencia Espacial Europea, centrada na supervivencia nun planeta xeado.
O 29 de abril incorporarase Trepang2, un shooter en primeira persoa de ritmo acelerado e alto contido de acción. Xa o 30 de abril chegarán varias propostas adicionais: Heroes of Might & Magic: Olden Era, precuela dunha das sagas máis influentes da estratexia por quendas; Sledding Game, unha experiencia multixogador centrada en deportes de neve; e TerraTech Legion, que combina construción de vehículos e combate contra inimigos controlados por intelixencia artificial.
Finalmente, o 5 de maio sumarase Final Fantasy V, un clásico do rol xaponés no que unha historia arredor de cristais místicos e destino conecta a un grupo de personaxes nunha viaxe épica.

: Final Fantasy V é todo un clásico dos xogos de rol xaponeses

Google Fotos incorpora novos retoques faciais rápidos e sutís

Redacción — 2026-04-20T19:00:00Z

Google vén de incorporar novas ferramentas de retoque no editor de imaxes de Google Fotos co obxectivo de facilitar axustes rápidos e discretos nas fotografías. A compañía de Mountain View aposta por opcións que permiten mellorar detalles do rostro mantendo un resultado natural e acorde ao momento capturado.
As novas funcións permiten refinar a textura da pel, eliminar pequenas imperfeccións, iluminar os ollos ou branquear os dentes en poucos segundos. O sistema está deseñado para un uso sinxelo: abonda con seleccionar unha cara na imaxe e escoller entre distintas ferramentas, como corrección, suavizado, axuste de olleiras, iris, dentes, cellas ou beizos. A continuación, o usuario pode regular a intensidade dos efectos aplicados.
Estas ferramentas de retoque comezaron a despregarse de maneira progresiva a nivel global dentro da aplicación Google Fotos para dispositivos Android. A súa dispoñibilidade require equipos con polo menos 4 GB de memoria RAM e versión Android 9.0 ou superior.

O CiTIUS achega unha ferramenta para entender como evolucionan os dereitos dixitais en Internet: DigiTrack

S. P. — 2026-04-20T15:30:00Z

O CiTIUS da USC desenvolveu unha plataforma que nos axuda a entender a evolución no tempo dos dereitos dixitais en Internet. Trátase da ferramenta DigiTrack, materializada en colaboración coa Fundación Hermes e enmarcada no Observatorio de Dereitos Dixitais (ODD), co apoio de Red.es.
O contexto
O centro da Universidade de Santiago especializado en intelixencia artificial indica que o ecosistema dixital condiciona cada vez máis o exercicio de dereitos fundamentais como a privacidade, o acceso á información, a non discriminación ou a participación. Nese contexto, engade CiTIUS, nace DigiTrack, unha ferramenta pública de busca e analítica sobre contidos web relacionados cos dereitos dixitais, deseñada para observar como evolucionan estes temas en Internet, detectar tendencias e ofrecer “unha base informativa útil para a análise, a comunicación e a acción pública”.
A ferramenta desenvólvese no marco do Observatorio de Dereitos Dixitais (ODD), co apoio de Red.es.
Como dixemos, DigiTrack foi desenvolvida polo CiTIUS (un centro cofinanciado pola Unión Europea a través do Programa Galicia Feder 2021-2027), en colaboración coa Fundación Hermes. A plataforma permite consultar e analizar contidos procedentes de fontes dixitais abertas, como noticias, redes sociais, blogs e outros espazos en liña, co obxectivo de ofrecer unha visión máis estruturada do debate público en torno aos dereitos dixitais.
O seu funcionamento permite identificar temas emerxentes, seguir a súa evolución no tempo, analizar sentimento e emocións asociadas aos contidos recompilados e facilitar unha lectura máis ordenada da conversa dixital.
“Este enfoque”, indican fontes do CiTIUS, “aliñase co propósito do Observatorio de Dereitos Dixitais, impulsado por Red.es, de reforzar o seguimento, a difusión, o debate e a promoción dos dereitos dixitais entre cidadanía, administracións, universidades, fundacións e organizacións sociais”.
O investigador do CiTIUS David E. Losada, responsábel do desenvolvemento de DigiTrack, explica que “a ferramenta está dotada de tecnoloxías e modelos avanzados de IA e recuperación de información, que foron adaptados ao dominio de dereitos dixitais e que proporcionan ao usuario final servizos como a organización automática de contidos por subtemas, o seguimento temporal de impacto, e a posibilidade de realizar consultas en texto libre mediante un buscador vertical, entre outros”.
Para Senén Barro, director científico do CiTIUS, “DigiTrack nace cunha vocación moi clara: transformar información dixital dispersa en coñecemento útil para comprender mellor como se expresan, evolucionan e se perciben os Dereitos Dixitais, particularmente na conversa pública”.
Desde a Universidade de Santiago de Compostela, a súa reitora, Rosa Crujeiras, subliña que “proxectos como DigiTrack reflicten a capacidade da universidade pública para xerar coñecemento aplicado, conectar investigación e servizo público e contribuír a retos sociais vinculados á transformación dixital”.
Pola súa banda, Luisa Alli, directora xeral da Fundación Hermes, destaca que “o desenvolvemento de ferramentas como DigiTrack reforza unha idea esencial: os Dereitos Dixitais non poden quedar nun plano declarativo, senón que necesitan observación, análise e capacidade real de actuación”.
Engaden que “a plataforma está concibida como un recurso útil para administracións públicas, xornalistas, investigadores, analistas e organizacións sociais, ao facilitar unha base estruturada para observar tendencias, detectar cambios na percepción social e apoiar diagnósticos, accións de sensibilización ou iniciativas vinculadas á cidadanía dixital”.

Apple podería adiar varios lanzamentos por mor dos problemas de subministración de memoria

Marcus Fernández — 2026-04-20T15:00:00Z

: Moitas das configuracións dos Mac Studio non poden adquirirse nin sequera con meses de agarda

Os problemas de escaseza de chips de memoria están a afectar seriamente á dispoñibilidade de produtos e ao calendario de lanzamentos de moitos fabricantes, impacto do que non se libra Apple, que actualmente experimenta problemas de existencias en equipos informáticos de sobremesa.
Se actualmente queremos facernos cun equipo Mac Studio non só atopamos que as configuracións máis habituais teñen un prazo de entrega de 10-12 semanas, senón que as configuracións máis completas directamente figuran como non dispoñibles e, de feito, Apple incluso retirou do seu catálogo a versión con 512 GB de memoria unificada.
No caso do Mac mini a situación é diferente, pois, aínda que non haxa existencias dos equipos, os prazos de entrega son de 5-6 semanas, o que segue a ser unha situación inédita para equipos que se corresponden con novos lanzamentos.
Neste escenario non sorprende a mensaxe que Mark Gurman lanza na última entrega do seu boletín Power On en Bloomberg, onde asegura que Apple estaría a adiar o lanzamento de produtos que se anticipaban dende hai meses. Por exemplo, estaba previsto o lanzamento dun novo Mac Studio en outubro e dun MacBook Pro con pantalla táctil a finais de ano, pero estes equipos poderían chegar máis tarde do desexado e incluso non ver a luz ata 2027.

Vodafone relanza o seu servizo de Internet portátil 5G

Redacción — 2026-04-20T14:30:00Z

Vodafone España reforza a súa aposta pola conectividade sen fíos cun relanzamento do seu servizo de Internet portátil 5G, acompañado dunha mellora das condicións comerciais e dunha nova expansión da cobertura da súa rede de última xeración. A operadora introduce un desconto de 10 euros ao mes durante un ano nos plans sen liña móbil asociada equiparando ademais esta oferta ás tarifas de só fibra para contratacións en liña.
O servizo baséase na tecnoloxía FWA (acceso fixo sen fíos) e ofrece velocidades de descarga de ata 1 Gbps sen necesidade de instalación. O equipo inclúe un router 5G con Wi-Fi 6 que se configura en poucos pasos e pode trasladarse con facilidade, o que o converte nunha solución flexible para segundas residencias, pemes, autónomos ou fogares situados en áreas sen cobertura de fibra óptica.
A modalidade independente ten un prezo de 20 euros ao mes durante os primeiros doce meses (posteriormente 30 euros), con envío gratuíto do router e compatibilidade co servizo de televisión da compañía. Ademais, existe a opción de complementar a oferta cunha liña móbil ilimitada con 60 GB a velocidade 5G por 43 euros ao mes.
En paralelo, Vodafone continúa ampliando a súa rede 5G e prevé alcanzar os 4.788 municipios en España antes de que remate o ano. Desta cifra, 1.088 corresponden a novas localidades distribuídas en 49 provincias. A expansión inclúe 625 municipios de menos de 1.000 habitantes e outros 463 por debaixo dos 50.000, nun movemento orientado a mellorar a cohesión territorial e reducir a fenda dixital.
A operadora está a empregar a banda de 700 MHz para reforzar a cobertura, especialmente en interiores, e garantir unha maior dispoñibilidade de ancho de banda. Esta tecnoloxía resulta especialmente relevante en contornos rurais, onde a conectividade condiciona o desenvolvemento económico e o acceso aos servizos dixitais.

A escaseza de memoria podería prolongarse ata 2027

Redacción — 2026-04-20T14:00:00Z

A industria global de semicondutores enfróntase a unha escaseza persistente de chips de memoria que podería estenderse ata, cando menos, 2027, por mor da crecente demanda asociada á intelixencia artificial e polas limitacións estruturais na capacidade produtiva. Os principais fabricantes, con sede en Estados Unidos e Corea do Sur, están a incrementar a produción de DRAM, pero a un ritmo insuficiente, estimado nun 60 % da demanda prevista.
A situación complícase pola inestabilidade xeopolítica en Oriente Próximo, que está a elevar os custos da electricidade e das materias primas, engadindo incerteza ás previsións de produción.
Samsung Electronics, líder mundial do sector, prevé poñer en marcha en 2026 a súa cuarta planta no complexo de Pyeongtaek (Corea do Sur), aínda que a produción a gran escala non comezará ata 2027 ou máis tarde. Ademais, a instalación tamén estará dedicada á fabricación de chips lóxicos, o que limitará a súa capacidade para incrementar a produción de memoria. Unha quinta planta, actualmente en construción, centrarase en memorias HBM (high-bandwidth memory), esenciais para sistemas de intelixencia artificial, pero non entrará en funcionamento ata 2028 como moi cedo.
No conxunto da industria, as restricións á expansión da produción son xeneralizadas, polo que o incremento da oferta previsto para 2026 e 2027 será moderado. SK Hynix, segundo maior fabricante mundial, puxo en marcha en febreiro unha planta de HBM en Cheongju, o que constitúe a principal ampliación de capacidade a curto prazo entre os tres grandes actores globais, xunto con Micron Technology. A compañía tamén está a acelerar a construción doutra instalación en Yongin, coa intención de rematala en febreiro de 2027, tres meses antes do previsto inicialmente.
Pola súa banda, Micron prepara o inicio da produción de HBM en Idaho (Estados Unidos) e en Singapur en 2027, ademais de iniciar a construción dunha nova planta en Hiroshima (Xapón) en maio deste ano, coa vista posta nun arranque produtivo en 2028. A empresa tamén adquiriu recentemente unha fábrica en Taiwán, cuxos produtos estarán dispoñibles a partir da segunda metade de 2027.
Estas tres compañías concentran preto do 90 % do mercado mundial de DRAM e son practicamente as únicas con capacidade para producir HBM. Nos últimos anos, priorizaron este tipo de memoria avanzada, esencial para a IA, en detrimento da memoria de uso xeral empregada en computadores persoais e smartphones. Esta estratexia provocou tensións no mercado desde finais de 2025, cun aumento dos prezos próximo ao 90 % no primeiro trimestre de 2026.
Segundo estimacións de Counterpoint Research, sería necesario un crecemento anual da produción do 12 % ata 2027 para equilibrar o mercado, pero os plans actuais sitúanse arredor do 7,5 %. A normalización entre oferta e demanda non se produciría ata 2028.
A presión sobre o sector xa está a trasladarse á industria tecnolóxica en xeral. A memoria representa actualmente arredor do 20 % do custo de fabricación dos smartphones de gama baixa, unha proporción que podería achegarse ao 40 % a mediados de 2026. Este incremento está a deteriorar a rendibilidade dos fabricantes, que poderían reducir a produción. Ao mesmo tempo, sectores como o automóbil tamén atopan dificultades para asegurar subministración suficiente.
A pesar das previsións de caída do 13 % nas vendas de smartphones en 2026, a demanda vinculada á intelixencia artificial segue en ascenso, o que introduce dúbidas sobre a capacidade do mercado para estabilizarse incluso cando entren en funcionamento as novas plantas. Ademais, a posta en marcha de instalacións de última xeración require tempo para acadar niveis de rendemento óptimos, o que prolonga a tensión sobre a oferta.
A evolución do sector dependerá, en última instancia, da capacidade dos fabricantes para ampliar a produción sen repetir episodios de sobreoferta como o rexistrado en 2023, cando a caída da demanda tras a pandemia provocou fortes perdas na industria.

En marcha a novena edición de campaña Toponimízate, na que participarán 12 novos concellos

S. P. — 2026-04-20T12:34:22Z

Santiago (a Cidade da Cultura) acolleu a presentación da novena edición da campaña Toponimízate. Falámosche dos noves da túa terra, iniciativa coordinada pola RAG (en colaboración coa Secretaría Xeral da Lingua) e enmarcada no proxecto Galicia Nomeada para favorecer a incorporación de nomes de lugar a través do uso de dispositivos e ferramentas dixitais. Na presentación participaron o presidente da Real Academia Galega, Henrique Monteagudo, e o secretario xeral da Lingua, Valentín García, quen destacou “a importancia da implicación da veciñanza coa conservación e recuperación dun dos nosos maiores tesouros, que é a toponimia”.
Na cita tamén estiveron presentes a subdirectora xeral de Planificación e Dinamización Lingüística, María Coutinho; e mais o encargado de impartir as charlas, Vicente Feijoo, coordinador técnico de Galicia Nomeada e do Seminario de Onomástica da RAG.
Sinalaron que nesta nova edición de Toponimízate participarán 12 novos concellos, “polo que teremos alcanzado nestes anos un total de 120 municipios”.
Henrique Monteagudo animou a veciñanza e as asociacións dos concellos implicados en Toponimízate 2026 a asistir ás charlas e se sumar a Galicia Nomeada. “Alén de poñermos en valor a importancia histórica e cultural da toponimia, con esta iniciativa tamén se potencia a función que exerce este valioso herdo como unha maneira de vincular afectivamente a xente coa terra”, destacou. O presidente da RAG referiuse ademais á función informativa duns encontros nos que haberá ocasión de comentar os cambios rexistrados na actualización do Nomenclátor de Galicia, levada a cabo polo Seminario de Onomástica da Academia e recentemente aprobada pola Xunta de Galicia.
Nesta liña, Valentín García sinalou que “ao incorporar máis persoas e identidades, seguimos a dar un relevante pulo a unha campaña que é todo un referente na preservación deste patrimonio inmaterial tan importante para a nosa identidade”. Apuntou tamén que a importancia de contar coa colaboración da cidadanía “quedou demostrada recentemente co traballo realizado para a actualización do Nomenclátor de Galicia, onde foi de grande axuda a colaboración da cidadanía para xeorreferenciar unha grande cantidade de microtopónimos, recollendo a tradición oral asociada aos nomes dos nosos lugares".
4.300 colaboradores e 110.000 microtopónimos
Durante e presentación lembrouse que actualmente xa participan no proxecto Galicia Nomeada, o marco no que se desenvolve a campaña Toponimízate, 4.300 colaboradores grazas aos que se levan introducido neste momento na plataforma preto de 110.000 microtopónimos. Trátase de nomes vencellados a montes, terras, fontes, camiños, regos, penedos ou praias, entre outros.
Esta mañá Santiago acolleu a presentación da novena edición da campaña Toponimízate. Falámosche dos noves da túa terra, iniciativa coordinada pola RAG (en colaboración coa Secretaría Xeral da Lingua) e enmarcada no proxecto Galicia Nomeada para favorecer a incorporación de nomes de lugar a través do uso de dispositivos e ferramentas dixitais. Na presentación participaron o presidente da Real Academia Galega, Henrique Monteagudo, e o secretario xeral da Lingua, Valentín García, quen destacou “a importancia da implicación da veciñanza coa conservación e recuperación dun dos nosos maiores tesouros, que é a toponimia”. Para a elección das 12 localidades que participan nesta nova quenda de charlas tivéronse en conta tres criterios principalmente: o estado de recolleita da súa toponimia tradicional, a ameaza que supón o despoboamento para a perda desta patrimonio, e o propio interese que amosaron as corporacións locais ou outras entidades culturais e veciñais en que a campaña visitase o seu municipio, como é o caso de Betanzos, Valdoviño, O Pereiro de Aguiar, Xunqueira de Ambía ou Moraña.
A campaña Toponimízate está baseada en relatorios divididos en diferentes fases. Así, primeiro faise unha introdución xeral para que as persoas asistentes coñezan a riqueza toponímica que ten Galicia e, tras esta presentación, explícase minuciosamente o funcionamento da aplicación colaborativa Galicia Nomeada, coa que a veciñanza poderá engadir na plataforma os topónimos que coñeza e a tradición oral vencellada a eles.
Por último, explícanse as utilidades prácticas para a Administración, o mundo da investigación e para a sociedade en xeral, desta información cultural, unha vez está xeorreferenciada e normativizada. Á vez, tras a recente aprobación do novo Nomenclátor de Galicia, tamén se fará referencia aos cambios introducidos que teñan que ver ese concello en particular, explicando as motivacións desas modificacións.
Charlas desde abril a outubro
As charlas realizaranse desde este mesmo mes de abril ata outubro. Así, o concello encargado de abrir a campaña será Moraña, o mércores 22 de abril, nunha cita á que está convidado o colexio Santa Lucía. O seguintes cinco encontros terán lugar en Poio , o 9 de maio; en Xunqueira de Ambía, o 22 de maio; en Valdoviño, o 29 de maio; en Betanzos, o 5 de xuño, e en Baleira, o 26 de xuño.
O calendario previsto continuará en Quiroga, o 28 de agosto; en Paradela, o 4 de setembro; no Pereiro de Aguiar, o 11 de setembro; no Bolo, o 25 de setembro; nas Neves, o 2 de outubro, e en Boimorto, o 9 de outubro.

GPUL School organiza unha sesión práctica sobre Proxmox e homelab na FIC

Redacción — 2026-04-20T12:06:41Z

O vindeiro 22 de abril ás 18:30 horas terá lugar na Aula 2.2 da Facultade de Informática da Coruña unha nova sesión formativa de GPUL School centrada na creación dun homelab desde cero mediante o uso de Proxmox.
A actividade, titulada De cero a homelab: Instalando Proxmox e despregando o teu primeiro servizo, ofrecerá unha introdución práctica a este contorno de virtualización de software libre, co obxectivo de facilitar os primeiros pasos aos asistentes. Durante a charla abordaranse cuestións como a instalación do sistema e o despregue de servizos, con exemplos concretos como Immich.
Ademais, a sesión incluirá unha revisión de distintos escenarios de homelab con varios niveis de complexidade, o que permitirá coñecer diferentes enfoques segundo as necesidades e os recursos dispoñibles.
A formación será impartida por Estevo Aldea, Martín García e Mateo Palmeiro, e forma parte das actividades impulsadas polo grupo GPUL para fomentar a aprendizaxe e o uso de tecnoloxías abertas. Recoméndase aos interesados en asistir que reserven a súa praza a través de Meetup.

A Escola de Enxeñería Industrial acolleu a 9ª edición de Robots en Acción cunha grande participación

S. P. — 2026-04-20T11:00:05Z

O pasado venres 17 de abril 452 estudantes de ensino medio de toda Galicia, incluíndo Ensino Secundario Obrigatorio, Bacharelato e Formación Profesional, participaban na Escola de Enxeñería Industrial (Vigo) na 9ª edición da súa Competición de Robots: Robots en Acción. Trátase dunha cita coa que o centro busca que mozas e mozos, “lle perdan o medo á tecnoloxía e se divirtan con ela”, tal e como salientou no comezo da xornada o ex-director da escola, Juan Pardo Froján, un dos dos principais impulsores desta iniciativa.
Botando unha ollada á primeira edición, o venres 24 de abril de 2015, cada ano, sempre coincidindo nun venres, a escola organiza unha nova edición desta particular competición. Nesta ocasión chegaron participantes desde: Allariz, A Guarda, A Estrada, Mos, Valga, Salceda de Caselas, Rois, Vigo... 292 rapaces e 159 rapazas divididos en 92 equipos, sendo 4º da ESO o curso que achegou máis participantes (248 estudantes divididos en 48 equipos), seguido de 1º de Bacharelato (106 estudantes en 22 equipos).
Indo ao encontro, ao longo de toda a mañá os equipos enfrontáronse ás diferentes roldas de probas. No caso da categoría Be Robot, para alumnado de ESO e Bacharelato, cada robot debía participar en dúas probas, o Segue-liña marchoso (con obstáculos e un lombo), na que o robot ten que ser quen de seguir un camiño marcado no chan do circuíto por unha cinta adhesiva branca de aproximadamente 2 cm de ancho sobre un fondo escuro, e Varrendeiro-cebra, na que dentro dun recinto circular (delimitado por unha liña branca sobre fondo negro) de arredor dun metro de diámetro se dispoñen 4 latas de refresco brancas repartidas de xeito aleatorio e tamén diferentes tiras brancas a xeito de paso de cebra. “O robot debe sacar do recinto todas as latas no menor tempo posíbel permanecendo sempre no interior do recinto e sen pasar por enriba das liñas do paso de peóns”, explican desde a organización.
Na categoría DemoRobot, para estudantes de FP e universidade, a competición abranguía catro probas, tres individuais e unha colectiva: Rastrexo (individual) que consiste en seguir un camiño marcado no chan; Labirinto (individual), sobre un recinto rectangular de aproximadamente 1,50x1,50 metros; Tripla penalti con illa (individual) dirixido a sacar todos os atrancos do recinto entre os paus que lle correspondan; e Sumo (colectiva), na que o robot debe tentar sacar o seu opoñente do campo de xogo e evitar que o saquen a el.
Asemade, desta volta contouse co desenvolvemento en paralelo do primeiro reto Compyrobot, en colaboración coa empresa Binarial no que participaron estudantes e docentes dunha decena de centros que tomaron parte na pasada edición e que entre os meses de outubro de 2025 e febreiro de 2026 tiveron que mapear unha ruta de cando menos 20 metros, dentro das instalacións dos seus centros e percorrela do xeito máis eficiente co robot móbil Compy, de Binarial, que deberon programar para acadar o mellor resultado
En canto aos premios, logo das finais, ao mediodía entregáronse os premios aos primeiros, segundos e terceiros clasificados nas diferentes categorías (1º+2º ESO, 3º+4º ESO, 1º+2º BACH e DemoRobot), así como os galardóns ao robot máis orixinal e o premio STEAM, que se outorgou en colaboración con AER Automation (Asociación Española para la Robótica y la Automatización). Alén disto, tamén tivo lugar a entrega dos recoñecementos aos centros participantes no 1º Reto COMPY Robot, organizado con motivo da conmemoración de X Aniversario na pasada edición.

A Aula CeMIT do Concello de Boiro ofrece novos cursos formativos en novas tecnoloxías para o mes de maio

S. P. — 2026-04-20T10:45:00Z

A Aula CeMIT do Concello de Boiro oferta novos cursos formativos en novas tecnoloxías para o mes de maio. As inscricións para participar deben facerse mediante o enderezo electrónico axentetic@boiro.org ou mediante os teléfonos 981 84 26 35 ou 629 769 139.
Os cursos que se van desenvolver no mes de maio son Manexo do móbil e apps, que será do día 4 ao día 7 en horario de 10.00 a 12.30 horas; Trámites electrónicos e medios de identificación, do día 12 ao 14 e de 10.00 a 13.30 horas; Introdución ao deseño e impresión 3D, do día 19 ao 21 e de 10 a 12.30 horas; e Libreoffice Calc do día 25 ao 28 en horario de 10.00 a 12.30 horas.

O LIES_GA organiza unha charla en liña sobre solucións e ferramentas para pemes da economía social

Redacción — 2026-04-20T10:30:00Z

O Laboratorio de Innovación e Economía Social de Galicia (LIES_GA) organiza o vindeiro 29 de abril, ás 10:00, a charla en liña Ciberseguridade na economía social: protexendo o futuro dixital — solucións e ferramentas para pemes da economía social.
A sesión ten como obxectivo proporcionar ferramentas e estratexias prácticas para que as entidades da economía social poidan protexer de maneira efectiva os seus datos e sistemas dixitais. Durante a actividade abordaranse cuestións clave como o uso de ferramentas básicas de seguridade informática adaptadas a cooperativas e pequenas empresas, as boas prácticas na protección de datos e información sensible, os protocolos de actuación ante incidentes de ciberseguridade e diversas recomendacións para avanzar cara a unha transformación dixital segura e accesible.
A charla será impartida por Adrián Vidal, hacker en dooingIT ciberseguridad, SL. Vidal é enxeñeiro informático pola Universidade de Santiago de Compostela e conta con certificacións especializadas en ámbitos como a criptografía e o pentesting (eCPPT). Dende 2022 desenvolve a súa actividade como hacker profesional, con experiencia na análise e explotación de vulnerabilidades, e participou no desenvolvemento de solucións tecnolóxicas como LeakGuard, orientadas á detección de filtracións de datos en internet.
A actividade está dirixida a cooperativas, empresas de economía social e entidades con impacto, con especial atención ás organizacións situadas no rural e aos colectivos con maior risco de fenda dixital, co propósito de contribuír a unha transformación dixital segura, sostible e inclusiva.
Esta iniciativa enmárcase no programa de actuación 2025–2026 da Rede Eusumo, unha rede de colaboración impulsada pola Secretaría Xeral de Emprego e Relacións Laborais da Consellería de Emprego, Comercio e Emigración para fomentar o cooperativismo e a economía social, e conta co financiamento do Ministerio de Traballo e Economía Social.

Netflix sobe os seus prezos en España

Marcus Fernández — 2026-04-20T10:13:49Z

A chegada de Netflix a España como un servizo de streaming de pagamento cunha ampla oferta de contidos e un prezo popular foi mudando moi lentamente, con pequenos cambios nas condicións do servizo que van dende a adopción de medidas para evitar compartir contas de usuarios ata a eliminación do plan máis básico para impulsar un plan con publicidade. E precisamente esta última tarifa, que busca ser a porta de entrada a Netflix, é a que experimenta a máis importante suba de prezo, pois xa son oficiais as novas tarifas de Netflix en España, e o plan con estándar con anuncios pasa de 6,99 a 8,99 euros.
Pola súa banda, o plan estándar ten un incremento de prezo máis moderado (de 13,99 a 14,99 euros), mentres que o plan premium pasa de 19,99 a 21,99 euros. Cómpre salientar que os plans estándar permiten o uso en ata 2 dispositivos á vez, mentres que o plan premium permite ata 4 reproducións á vez, contando tamén con maior calidade de imaxe (permitindo 4K con HDR en vez do Full HD do resto de tarifas).
Temos aquí un claro exemplo do concepto de merdificación, cun servizo que non cesa de incrementar prezos á vez que empeora as súas condicións, centrándose na súa explotación económica en vez de en ofrecer unha boa experiencia de uso.

: Nova táboa de tarifas de Netflix

A Aula CeMIT da Deputación de Pontevedra celebra en maio un obradoiro de manexo de redes sociais

S. P. — 2026-04-20T10:00:00Z

A Deputación de Pontevedra acolle durante o mes de maio na Aula CeMIT un obradoiro presencial destinado a facilitar o uso das novas tecnoloxías no día a día e mellorar a seguridade dixital das persoas participantes. O obradoiro, baixo o título Aprende a manexar as túas redes sociais, celebrarase do 25 ao 28 de maio en horario de 10:00 a 13:00.
A acción formativa, de 12 horas de duración, achegará as pautas para empregar redes sociais como Facebook, Instagram, TikTok e X. Ademais afondará nas funcionalidades de WhatsApp e Telegram de forma práctica, así como en cuestións relacionadas coas súas configuracións e coas ferramentas clave para promover unha comunicación dixital máis eficiente e conectada. As persoas interesadas en asistir poden inscribirse na web da CeMIT.
Aprende a manexar as túas redes sociais é totalmente gratuíto e desenvolverase na Aula CeMIT situada no Edificio Administrativo da Deputación na cidade de Pontevedra. A acción forma parte do programa YoConecto promovido pola Fundación Cibervoluntarios, con 20 prazas dispoñíbeis. Ao seu remate, as persoas participantes recibirán un certificado oficial.

esLibre26 leva o software libre ao rural e reúne en Melide preto de 200 asistentes

Redacción — 2026-04-20T09:23:22Z

O congreso estatal esLibre26 pechou en Melide tras dúas xornadas de actividade que reuniron preto de 200 asistentes, consolidando unha comunidade activa arredor do software libre, a tecnoloxía aberta e o coñecemento compartido. O encontro, que nesta edición se trasladou ao rural galego, puxo o foco tanto nos contidos técnicos como na dimensión social e comunitaria destas prácticas.
A cita arrancou cunha primeira xornada centrada na educación, a accesibilidade e o papel do software libre nas institucións públicas. Máis dun cento de persoas participaron nun programa que incluíu unha ducia de charlas e varios talleres orientados ao intercambio de coñecemento. Iniciativas como eXeLearning ou propostas baseadas en plataformas abertas con intelixencia artificial abordaron novas formas de creación e difusión de contidos formativos, mentres que o debate arredor dos Recursos Educativos Abertos puxo de relevo o seu potencial para democratizar o acceso á aprendizaxe.
A irrupción da intelixencia artificial no ámbito educativo foi tamén un dos temas destacados, con proxectos internacionais que analizaron os retos derivados da súa incorporación ás aulas e a necesidade de repensar os modelos pedagóxicos desde unha perspectiva aberta. A accesibilidade, pola súa banda, foi tratada como un dereito fundamental, destacando o papel do software libre como ferramenta para garantir o acceso universal á tecnoloxía.
No plano institucional, exemplos como a implantación de LibreOffice en administracións públicas evidenciaron o potencial destas solucións para reforzar a soberanía tecnolóxica e a independencia das entidades. Ademais, o encontro acolleu a XIII Xornada de Usuarios de R en Galicia, reforzando a conexión entre o ámbito científico e o ecosistema do software libre.
A segunda xornada ampliou o foco cara á soberanía dixital e as infraestruturas abertas, con propostas que exploraron a relación entre xornalismo e intelixencia artificial, así como os desafíos éticos e tecnolóxicos dos modelos de linguaxe ou da IA autoaloxable. Xunto a estes contidos, tiveron presenza iniciativas de intercooperación, ciberactivismo e economía social, así como cuestións vinculadas á transición enerxética, o autoconsumo ou a protección de datos.
O programa técnico completouse con talleres e relatorios sobre programación, desenvolvemento web, creación musical, produción audiovisual e electrónica, evidenciando a diversidade e madurez do ecosistema do software libre.
Máis aló das sesións formais, esLibre26 destacou polo seu carácter comunitario e pola integración co territorio. A inauguración contou coa participación da gandeira e creadora de contido Lucía Casal, que reivindicou o valor do rural como espazo para desenvolver proxectos e comunidade, nun acto que incluíu tamén música tradicional local. Ao longo dos dous días organizáronse actividades paralelas como rutas guiadas, exposicións ou encontros informais, reforzando os vínculos entre tecnoloxía, cultura e identidade local.
Desde a organización subliñouse o papel clave do voluntariado e da comunidade local, así como a relevancia de levar un evento destas características fóra das grandes cidades. «É un orgullo traer esLibre a Melide», sinalou Rafael Gaioso (organizador do congreso e membro de MeLiSA), destacando que a resposta do público e o ambiente xerado consolidan o encontro como un punto de referencia no ámbito do software libre.

O Carballo Interplay premia a T-Rex (mellor serie) e o talento galego a Miradenovo e Antontísimo

S. P. — 2026-04-20T09:01:42Z


Público na entrega de premios do CIP (fotos de Aigi Boga)

O festival de contidos dixitais Carballo Interplay despediu este domingo 19 de abril a súa 13ª edición coa entrega de premios do festival, nunha xornada final na que se deu a coñecer o palmarés da súa competición internacional de series de formato curto e tamén os proxectos recoñecidos nos certames dedicados á creación de contido dixital en galego.
O peche do encontro serviu así para poñer o foco tanto na diversidade e calidade das propostas audiovisuais que pasaron pola Sección Oficial como no talento que está a impulsar novas formas de creación na rede desde Galicia e en lingua galega.
No apartado internacional, o Premio á Mellor Serie, dotado con 800 euros e trofeo, foi para T-Rex (Canadá, 2024), un retrato íntimo de tres amigos de nenez que, durante unha fin de semana nunha cabana, afrontan os seus propios conflitos coa masculinidade.
Pola súa parte, o Premio á Mellor Dirección, dotado con 200 euros e trofeo, recaeu en Ruby (Francia, 2025), unha serie queer de superheroínas que segue a unha moza en plena deriva vital tras unha ruptura e a súa inesperada conversión en icona viral.


O Premio do Público

O Premio do Público, dotado con 400 euros e trofeo, foi para The Struggle for Existence - S2 (Dinamarca, 2025), unha comedia sobre dous amigos que encaran con humor os desafíos da masculinidade contemporánea, os novos roles de xénero e a vida adulta (lembrar que a primeira tempada desta serie xa pasara pola Sección Oficial do Carballo Interplay).
Mentres, o Premio Xurado Novo, tamén dotado con 400 euros e trofeo, distinguiu Eyes In The Woods (Canadá, 2025), un misterio paranormal queer ambientado nun bosque no que se entrecruzan segredos, gardas forestais e a atracción polo descoñecido.
O Xurado Oficial da competición internacional estivo integrado por Benja Villegas, Raquel Piñeiro e Irene Pin, mentres que o Xurado Novo estivo formado por Belén Teiga, Aira Portos e Antón Lorenzo.

Recoñecemento ao talento dixital en galego


O premio a Miradenovo (mellor canle)

No marco dos premios dedicados ao contido dixital en galego, o festival volveu visualizar e enxalzar “a vitalidade, a personalidade e a diversidade dos proxectos que se desenvolven actualmente nas plataformas dixitais en lingua propia”, en palabras da organización. O Premio á Mellor Canle, dotado con 600 euros, foi para Miradenovo, “por conectar con todo tipo de público, amosarnos as posíbeis futuras vidas das cousas, a visión á hora de crear unha canle con este contido tan específico en galego e facer que todas queiramos ter as casas máis trendy”.
O Premio á Mellor Creadora ou Creador, tamén dotado con 600 euros, foi para @Antontisimo, “por ser o carisma personificado, atraparnos desde o primeiro segundo e apostar por unha Internet sen artificios onde o importante é o contido. Para que nos siga dando a chapa moitos anos máis sobre as cousas que lle gustan”.
O xurado destes galardóns estivo composto por Sara Seco, Andrea Villa Feijóo e Adrián Pérez (autor do perfil @Salseologia).

Impulso á produción de novos proxectos


O premio a Atontísimo

Ademais, o Premio á Produción de Contido Dixital en Galego, dotado con 3000 euros, foi para o proxecto Crossbooking Castelao, unha proposta de microdrama baseado na obra de Castelao. Con este recoñecemento, o festival mantén unha das súas liñas de apoio á creación dixital en galego, favorecendo o desenvolvemento de novas propostas pensadas para o ámbito en liña.
O xurado encargado de seleccionar este premio estivo integrado por Román Varela, Maite Parga e Sandra Lesta.
Ao longo de catro días, o Carballo Interplay desenvolveu no Mercado de Carballo unha programación que combinou a exhibición da súa Sección Oficial de series coas estreas de Millennial Mal e Epidemia Invisible, ademais de paneis como Scroll, scroll, STOP. As novas regras da divulgación e Internet chiquito, espectáculos e podcasts en directo como Bimboficadas, Sexo en Nueva York Podcast, Pop y Muerte, I'll see you in my dreams, Twin Peaks e Código Fonte Audiovisual, o concerto de Pantis, as actividades de Zona PRO e as propostas arredor da creación de contido dixital en galego.
“A 13ª edición pechou así reafirmando o seu papel como unha cita de referencia para a reflexión, a exhibición e o impulso ao talento arredor da cultura dixital contemporánea”, sinalou a organización, formada polo Concello de Carballo e Turismo de Carballo co apoio da Deputación da Coruña e da Xunta de Galicia a través da Axencia Galega das Industrias Culturais.

A Deputación de Pontevedra achega formación en deseño de sitios web a través da Rede SmatPeme+

S. P. — 2026-04-20T08:00:00Z

A Deputación de Pontevedra organiza esta semana un novo obradoiro de capacitación tecnolóxica ao abeiro da Rede SmartPeme+. A acción formativa, telemática e con inscrición previa, afondará nunha cuestión de grande interese para o tecido empresarial da provincia como é o deseño de sitios web ou tendas en liña desde cero.
O obradoiro Deseña a túa web profesional de forma sinxela con WordPress celebrarase este mércores 22 de abril a partir das 12.00 horas. Trátase dunha formación de carácter práctico deseñada para que as pequenas empresas e emprendedores aprendan a crear o seu propio sitio web ou tenda online desde cero utilizando a plataforma WordPress e o construtor visual Elementor dunha forma rápida, visual e sen necesidade de coñecementos de programación. Será impartido polo experto en deseño web, mercadotecnia dixital e posicionamento Guillermo Nass, con inscricións en liña dispoñíbeis.
A Deputación destina este ano 740.000 € á Rede SmartPeme+, un servizo que por vez primeira se coordina cos Polos de Emprendemento da Xunta de Galicia co obxectivo de cubrir todo o territorio da provincia. Deste xeito, desde as oficinas de Vigo, Pontevedra e Ponteareas levaranse a cabo actividades formativas relacionadas co crecemento empresarial e a transformación dixital, asesorando a emprendedores, autónomos e pemes e impartindo talleres formativos e actividades complementarias.

A FP galega amosa esta semana o seu potencial na oitava edición de FP Innova

Redacción — 2026-04-20T07:30:00Z

A Formación Profesional galega exhibe esta semana o seu potencial en investigación e innovación aplicada en FP Innova 2026, cun total de 38 centros de toda Galicia representado nos 4.100 metros cadrados do recinto máis de 70 iniciativas, que inclúen proxectos de innovación, emprendemento e distintos obradoiros. A cita, impulsada pola Xunta, incorpora tamén unha exposición de robótica, demostracións de ciberseguridade e espazos nos que participar en experiencias inmersivas e de realidade virtual.
O programa abrangue igualmente o Congreso FP Innova, que terá lugar o día 22 no Edificio Fontán coa asistencia de arredor de 700 persoas entre docentes e representantes do ámbito empresarial. Trátase dun encontro de referencia na innovación didáctica e tecnolóxica destas ensinanzas, organizado pola Consellería de Educación, Ciencia, Universidades e FP.
Nesta oitava edición, FP Innova celébrase entre o mércores 22 e o venres 24 de abril no Museo Centro Gaiás da Cidade da Cultura, cunha previsión de preto de 10.000 estudantes de Primaria, Secundaria, Bacharelato e FP procedentes de 181 centros galegos. Ademais, o evento estará aberto ao público xeral de balde en horario de 10:00 a 14:00 e de 16:00 a 19:00 os días 22 e 23, e na mañá do día 24.
No apartado tecnolóxico, os 39 proxectos de innovación presentes na feira exemplifican o uso de ferramentas punteiras para dar resposta aos retos actuais. Moitas destas propostas céntranse na dixitalización, a intelixencia artificial, a ciberseguridade, as tecnoloxías inmersivas, a automatización e a robótica co obxectivo de mellorar a sustentabilidade e a eficiencia nos sectores produtivos.
Entre as iniciativas destacadas figura VoaComida, do CIFP Manuel Antonio de Vigo, que combina a elaboración de menús en envases biodegradables cun sistema de reparto mediante drons e intelixencia artificial para personalizar dietas e optimizar rutas. No ámbito da automoción, o IES de Vilalonga desenvolveu ARDIA, un arco de diagnose automatizado que integra visión artificial, sensores e algoritmos de aprendizaxe automático para detectar danos e mellorar os tempos de traballo nos talleres.
Tamén sobresae brAlnbot, do CIFP Politécnico de Lugo, un sistema robotizado orientado á interacción en xogos de estratexia como o xadrez, que combina brazo mecánico, visión artificial e motor de decisión. No eido audiovisual, o CIFP A Xunqueira de Pontevedra presenta SIAX, un equipo autónomo para a gravación e emisión en streaming de procesos gastronómicos sen supervisión técnica directa.
No sector primario, o CIFP Ferrolterra propón AbeiroTec, un refuxio autónomo para o manexo de gando en extensivo que integra sistemas de alimentación e vixilancia remota mediante tecnoloxía IoT, contribuíndo tamén á prevención de incendios forestais.
A área de emprendemento reúne 19 iniciativas vinculadas ao programa Eduemprende e á Rede Galega de Viveiros de Empresas. Entre elas destacan Pas eólicas, unha segunda oportunidade no mar, centrada na reutilización de pas de aeroxeradores como flotadores para bateas, ou Outpick, un armario virtual intelixente para organizar o vestiario. Tamén se presentan proxectos empresariais como Os doces de Sandra, de pastelería artesanal, e AgroSpectral S.L., que utiliza drons para optimizar a xestión de cultivos.
A dimensión inclusiva da FP ten presenza con Florecendo, unha miniempresa do Centro de Educación Especial Santa María de Lugo dedicada á elaboración de kits de cultivo con materiais reciclados.
Os obradoiros permitirán ao alumnado visitante experimentar con tecnoloxías como a creación de videoxogos, a biotecnoloxía, a impresión 3D, a robótica, a programación en linguaxe natural ou as artes gráficas.
O evento complétase cunha exposición de robótica con dispositivos humanoides e sistemas orientados á asistencia de persoas, demostracións prácticas de ciberseguridade e espazos de tecnoloxías inmersivas que amosan novas formas de interacción dixital. Entre as experiencias destaca un simulador de voo inmersivo de corpo completo.
A orientación profesional contará co apoio de OPI Orienta, un asistente virtual que facilitará información sobre as ensinanzas de FP.
No que respecta ao congreso, analizaranse os avances en intelixencia artificial, automatización, robótica e tecnoloxías inmersivas, con especial atención á formación docente en ciberseguridade. O obxectivo é reforzar competencias, actualizar metodoloxías e promover unha cultura sólida de seguridade dixital nos centros educativos. Ademais, abordaranse as principais liñas de investigación e innovación aplicada de cara ao vindeiro curso académico.

Preto do 87 % das empresas tecnolóxicas galegas emprega software libre

Redacción — 2026-04-20T07:00:00Z

O 86,9 % das empresas TIC galegas contan con software libre nalgún dos seus equipos informáticos, o que representa un incremento do 2,7 % respecto ao ano anterior. Así o recolle o estudo O software libre nas empresas TIC de Galicia (Edición 2024), elaborado polo OSIMGA e publicado a pasada fin de semana.
O documento indica que máis da metade das compañías que xa empregan solucións libres avanzan cara a modelos mixtos: o 57,4 % utiliza tanto ou máis software libre ca privativo, un dato que evidencia o seu uso efectivo nas organizacións. No caso dos servidores, un ámbito clave das infraestruturas tecnolóxicas, o 50,8 % aposta maioritariamente polo software libre, mentres que un 27,7 % o emprega de forma exclusiva.
As aplicacións libres máis estendidas nas empresas galegas continúan a ser os navegadores web, as ferramentas ofimáticas, os xestores de contidos e os clientes de correo electrónico, todos eles cunha presenza do 49 % ou superior.

Diferenzas por provincias e sectores de actividade

O informe sinala que Ourense (96,3 %) e Lugo (95,5 %) son as provincias cun maior nivel de implantación do software libre. Tamén apunta que as empresas con actividade en Galicia pero con sede fóra presentan un maior uso relativo de software privativo.
Por sectores, as compañías encadradas en Outros Servizos TIC e Actividades Informáticas lideran a dispoñibilidade de solucións libres, superando o 89 %. No que atinxe ao uso, destaca o sector das Telecomunicacións, onde máis do 80 % das empresas que dispoñen destas solucións as empregan de maneira prioritaria.

As empresas TIC como provedoras de solucións libres

O 46,7 % das empresas TIC galegas ofrecen produtos ou servizos de software e, dentro deste grupo, case a metade (46,2 %) comercializan solucións baseadas en software libre, cunha presenza especialmente destacada en Lugo e Ourense.
Entre as principais vantaxes que perciben os clientes figuran o menor custo (80,4 %), a capacidade de personalización e a independencia respecto do provedor.

Retos pendentes do software libre

O estudo tamén identifica algunhas barreiras relevantes para a súa adopción, como o descoñecemento da tecnoloxía (50,7 %), a falta de formación (37,6 %) ou os problemas de compatibilidade cos sistemas existentes (36 %).
A pesar destas dificultades, o informe subliña que Galicia dispón dun ecosistema TIC sólido e cada vez máis especializado, no que o software libre se afianza como un piar clave para a innovación e a soberanía tecnolóxica.