Huawei adiántase a Apple e Samsung nos teléfonos encartables anchos

Huawei presentou o deseño do seu novo smartphone encartable, o Pura X Max, un dispositivo que aposta por un formato máis ancho do habitual e que se lanzará en China o vindeiro 20 de abril. A proposta da compañía chinesa chega antes de que Apple e Samsung materialicen os seus propios plans nesta categoría de produto.
A información dispoñible polo momento é limitada, mais as primeiras imaxes oficiais deixan ver un terminal dispoñible en varias cores (azul, branco, laranxa e negro) e cun sistema de cámara traseira tripla. O deseño mantén elementos do anterior Pura X, con seccións diferenciadas e acabados texturizados, pero aposta por un corpo máis ancho que o doutros encartables actuais.
Este novo modelo semella situarse a medio camiño entre os formatos tipo cuncha e os de apertura en libro, lembrando tamén propostas iniciais como as primeiras xeracións de encartables doutros fabricantes. De feito, a propia Huawei amosa o dispositivo en uso tanto en orientación vertical como horizontal, reforzando a súa versatilidade.
O Pura X Max segue a liña do modelo anterior, que xa introducía un enfoque pouco convencional ao requirir xirar o terminal ao abrilo. Neste caso, a evolución céntrase nun formato máis amplo, que podería marcar tendencia no sector.
Entre os poucos datos técnicos coñecidos, fálase dunha pantalla interna cunha relación de aspecto próxima a 16:11 e configuracións que van desde os 12 GB de memoria RAM con 256 GB de almacenamento ata opcións de 16 GB e 1 TB. Tamén se apunta á posibilidade de que integre un procesador Kirin 9030, aínda sen confirmación oficial.
Todo indica que o Pura X Max quedará restrinxido ao mercado chinés, pois a marca segue afectada polas sancións dos EE.UU. que fai que non poidan integrar Android nos seus dispositivos, facendo que non resulten aceptables para un usuario occidental.